Albiste interesgarriak ekinBarri
CECOBIko taldea barne-kohesioa lantzen ekinBarri PRO programaren bidez
Bizkaiko Merkataritza Enpresarialaren Konfederazioak (CECOBI) ekinBarri PRO programan parte hartzen hasi da, bere zuzendaritza-taldearen kohesioa indartzeko, barne-konpromisoa sendotzeko eta datozen urteetako erronkei aurre egiteko erakundearen prestaketa estrategikoa aurreratzeko helburuarekin.
Erakundeko zuzendaritza-taldearekin egindako saioak hausnarketa partekaturako gune bat irekitzea ahalbidetu du, taldearen barne-funtzionamendua aztertzeko, indarguneak identifikatzeko eta hobekuntza-arloak detektatzeko, besteak beste lidergoan, komunikazioan edo erabaki-hartzean.
CECOBIrentzat, ekinBarrin parte hartzea proiektuaren erakunde sustatzaileetako bat den aldetik eredua ematea ere bada. Erakundea ekimen hau bultzatzen duen aliantzaren parte da, CEBEK, FVEM, ASCOBI-BIEBA eta AVEQ-KIMIKA erakundeekin batera, Bizkaiko Foru Aldundiaren babes instituzionalarekin, Bizkaia with the Talent programaren barruan.
CECOBIko idazkari nagusi Marta Fernándezek azpimarratu du prozesu mota hauetan zuzenean inplikatzearen garrantzia:
«Funtsezkoa iruditzen zaigu ekinBarri bultzatzen dugun erakundeok proiektua laguntzera soilik ez mugatzea; sakon ezagutzea, modu aktiboan parte hartzea eta benetan prozesuaren parte izatea ere beharrezkoa da».
Jardunaldian zehar, CECOBIko taldeak bere lan-dinamikaren lehen diagnostikoa egin zuen, eta modu irekian landu zituen lidergoarekin, barne-komunikazioarekin, taldearen garapenarekin eta harreman-klimarekin lotutako hainbat alderdi.
«Lehen hurbilketa oso aberasgarria izan da. Oina uretan sartu dugu… eta orain murgiltzeko prestatu behar dugu», adierazi du Fernándezen hitzetan, saioan sortu zen konfiantza- eta hausnarketa-giroa azpimarratuz.
ekinBarri PRO programa zuzendaritza-taldeei zuzendutako esperientzia intentsibo gisa diseinatuta dago, etorkizuneko erakunde-erronketarako prestaketa azkartzeko helburuarekin. Bost arlo nagusitan —lidergoa, komunikazioa, erabaki-hartzea, garapena eta harreman-klima— egindako diagnostikoaren bidez, hobekuntzarako palankak identifikatu eta ekintza-plan zehatzak definitzen dira.
Gainera, parte hartzen duten erakundeek beren taldearen bilakaera jarraitu dezakete ekinBarriTECH tresna teknologikoaren bidez, saioaren ondorengo hilabeteetan aurrerapena neurtzeko.
Jardunaldian Gonzalo Serrats ekinBarrilariak eta OPE Consultores-eko aholkulariak lagundu zuen, lan-prozesua gidatuz.
Ekimen honen bidez, CECOBIk, Bizkaiko 45 gremio- eta zonalde-elkarte biltzen dituen erakundeak, pertsonetan oinarritutako lidergo enpresarial kontzienteago, kolaboratzaileago eta lerrokatuago baten aldeko konpromisoa indartzen du.
