Albiste interesgarriak
Bizkaiko Foru Aldundiak eskualdeko laugarren arreta-bulego integrala jarri du martxan Balmasedan, eta une horretatik aurrera, Ogasuneko bulegotik ematen ziren zerbitzu guztiak eta herriko Eskualdeko Nekazaritza Bulegoan eskaintzen zirenak biltzen ditu, bai eta foru erakundeko gainerako departamentuen beste izapide eta zerbitzu batzuk ere, 150 baino gehiago izan arte.
Balmasedako instalazio berriek 225 metro koadroko lokal bat hartzen dute Kubo kaleko 3, 4 eta 5 zenbakietan, eta Balmasedako Udalak laga du lokal hori. Foru Aldundiak 440.000 euro inguruko inbertsioa egin du dagoeneko 15 pertsonak lan egiten duten bulego berri hori martxan jartzeko.
Balmasedako bulegoak harrera-gune edo -puntu bat du. Bertan, pertsona batek ongietorria emango die erabiltzaileei, eta haien beharrak eta zerbitzu mota detektatuko ditu, bulego barruko arreta-gunera bideratzeko. Arreta-gune horiek hamahiru dira guztira: izapide orokorrei erantzuten dietenak (5 lanpostu), Ogasun Sailari lotutako izapide espezializatuei dagozkienak (3 lanpostu) eta Iraunkortasun eta Ingurune Naturala Sustatzeko Sailari lotutako izapide espezializatuei dagozkienak (9 lanpostu). Bulegoak beste areto bat ere badu arreta pribatuagoa behar duten gaietarako.
Jendaurreko ordutegia 8:30etik 14:00etara izango da astelehenetik ostiralera, udan izan ezik (ekainaren 14tik irailaren 10era), orduan 8:30etik 13:30era artatuko baita jendea.
Izapide eta zerbitzu berriak
Lehen Ogasuneko bulegoan eta ENBn (Eskualdeko Nekazaritza Bulegoa) egiten ziren zerga-kudeaketez eta nekazaritzako izapideez gain, Balmasedako bulegoak 150 zerbitzu baino gehiago eskaintzen dizkie herritarrei, eta horietako batzuk instalazio horietatik ematen dira lehen aldiz, hala nola: Bizkaiko Foru Aldundiko sail guztietako zerbitzuei buruzko informazio orokorra, erakunde honi eta beste administrazio publiko batzuei zuzendutako idazkien erregistroa; jakinarazpenak entregatzea, Aldundiko hautaketa-prozesuetan izena ematea, Aldundiak kudeatutako gizarte-prestazioak kobratzeari/ez kobratzeari buruzko ziurtagirien jaulkipenak, familia ugariaren titulua, sinadura elektroniko aurreratuko ziurtagiriak, eta kexak eta iradokizunak aurkeztea.
